e... tokalo me učinit štagod kilometri, ali isplatilo se.
a di smo bili, ča smo činili, a? sad ćete sve doznat.
najprvo da vam pokažen dva litrata iz mista ča se zove marina. to je jedno malo misto između splita i šibenika, tot smo popili jutarnju kavicu.
ovi mi je litrat prva liga, snage i snagice, vidili smo motorin vozi ka veliki 
poza kavice pali motore i pravac mandalina, šibenik. tot je adriatic boat show 2009 . drago mi je da smo ga vižitali i to ću napisat debelin slovima.
evo i zaradi čega:
šibenčani su se temeljito potrudili oko organizacije. parking su nam naplatili 20 kunića (cijena za cili dan), ali uvodili su red i jemali smo di ostavit tonobil. puten do mandaline je bilo oznaka i brez problema smo sve našli. sajam nije bija parada prevelike moći, ali san se na njemu ćutila lipo. svit je bija komunikativan i obavili smo dosta poslovnih razgovora. na svakon štandu je bila i poneka sitnica ka darić tipa lapiš oli fajerica, u splitu odavno fale i vizitke kod mnogih izlagača i to mi masu puti gre na nerve - na sajam triba donit propagandni materijal, na sajmu triba radit, a ne odšetat i ostavit prazan štand jerbo svit je tot doša nešto vidit i pitat,. e a je li tako, a? u šibeniku je sve ča se tega tiče dosta dobro štimalo. karta je 35 kunića ča smatran skroz normalnon i pristupačnom cifrom.
evo i koji litrat, znan da to čekate...
narafski, ko god oče na miru pogledat litrate sa sajma u mirnoj verziji more to komodno učinit ovod. http://www.flickr.com/photos/xvii_st3/sets/72157622287525521/
uvećajte klikon. na sajmu smo bile ja i ingrid - to je bila ka jedna radna vižita za Parametar doo , mene ćete lako poznat jerbo jeman poduzetničku kapu na glavi.
dosta san brodića sinjala ča bi još mogli proč ka pristupačno rvackom čoviku. na sajmu je bilo i tonobili, brodskih makinja, teknike, penti, ma svega povezano uza more.sve u svemu svidilo mi se, palac gori! 
onda smo otišli u sam šibenik. šibenik trenutno jema i srednjovjekovni sajam. evo litrati (ako ne morete ovo upratit, napravite reload stranice)
mirni litrati su tot: http://www.flickr.com/photos/xvii_st3/sets/72157622412174304/
ovo mi se strašno svidilo, a priznat ćete da triba reč svaka čast svim učesnicima jerbo nije lako po vrućini nosit tešku robu i postole, e...
evo mi i tri slije o' isprid najpoznatijega objekta u šibeniku, šibenske katedrale.
najprvo ja i moja prija selma iz šibenika - inače poznata blogerica ča puno lipo piše na http://selma.mojblog.com/ , ako dosad niste bili na toj stranici, povirite, nač ćete nešto ča je puno lipo, umjetnost, komadići duše za dušu.
nada (gori) i ingrid (doli), e a mi smo iz splita
selmi ćemo se zafalit ča nas je u šibeniku lipo dočekala i ča nas je odvela na srednjovjekovni sajam, ali i ča je dala upute kako doč do mandaline bolje vengo gps (oni je mlija i ko ga je opče više sluša, a i gleda. kad smo se vraćali bija je u škafetinu, ištekan i sam jerbo nas je štufa, ali dobro, neka ga, nikad ne znaš kad će dobro doč, e). e sad, u šibeniku san twingića stavila u jednu uličicu ča je pušti me proč đir, a tot san završila zaradi nekoga idiota ča me doslovce gonija po magistrali a poza tega ulicama grada šibenika. alo, pulicija, ustanove, zaradi čega vam takvi pacijenti šetaju i ča je još gore voze, a? selma nas je lipo škapulala iz te uličice na čemu i ovin puten zafaljujen da ne bi nje teško bi se tot izvukla. eto kako je lipo svugdi jemat drage peršone, kumpanje, prijatelje.
ajmo ča dalje, selmu smo ostavili u šibenik i na obid i kupanjac smo otišle na otok murter.
na murteru san se naidila ka pas jerbo su pola restorana pozatvarali, a furešti oče nešto izist. domaći isto. eto, čovik oče potrošit pineze i onda triba tražit di poč, e...
e ma našla san restoran tic tac, uz more, bilo mi je ka begu, e... disali smo vonj mora i izli morski obid - lignje.
sad ćete reč da stalno gledan di ću izist lignje, ali one mi pašu kad san na putu. lipa lagana spiza.
evo tri sličice iz restorana ča je danas vridno radija i di nam je bilo lipo.
dalmatinski ambijent, blizina mora, dobra spiza, ovi bi me moga i još koji put vidit, narafski, nadan se da se neće umislit i da će nastavit vridno radit...
je li mislite da je tot finija izlet, a? ma ke... ajmo ča u valu slanicu. triba se i okupat, more je sad fantažija, e...
ovo ča se na donji litrat nazire su kornati.
vozila san ovoliko za vidit sajam, ali i za vidit kornate iz slanice. ovo mi napuni baterije i vrati me u život.
bi li vidili još koji litrat, a? nisu vas štufali brodi, a? ajde, gren van pokazat Brode s velikin B. di je najlipši Brod na svitu, a? na OTOKU MURTERU - tot je Brod drven, lipo pituran, toj je Brod svetinja. evo Brodovi Murtera, uvik ovod uvatin lipe litrate, nikad dosadne, uvik drugovačije.
ekola finito izlet, u betinu, misto iz kojega vučen gene po ćaći koje je inače misto najboljih drvenih brodova ovi put nisan stigla njanci povirit. vozila san po mraku nazad, magistrala noću baš i nije bajka, od trogira do splita konfužjun, prva-druga, došli smu u split u kasnije ure. bija je to dan ka san.
e... dana 29.08.2009. (vidi linkić obavezno) san položila vozački ispit.
godinu dan poslin smo bili na izlet ča smo ga nazvali vlaško-bodulski miks. di smo bili, ča smo činili, a?
sad ćete sve doznat, e...
malon ceston priko zagore i nismo otišli najprvo na more, ma ke, e...
krka, visovac, na slici s liva na desno: moja mater, gorka magazin, božo sušić iz autoškole sušić di san položila vozački i moja malenkost.
narafski, ja san nas dovezla tot jerbo fala bogu moja vozačka nije za škafetin vengo je duperan da njon vozin. barba boži ćemo se zafalit za korisne upute koje mi je dava za vožnju po dalmatinskoj zagori. narafski da san i danas puno naučila... za ove litrate ćemo se zafalit djelatniku NP Krka kojega je barba Božo odma pita iz kojega je sela oliti kako se po vlašku reče čigovi je i dozna da zna sve njegove... nikakvo čudo, po selima svak svakoga zna..
ajmo mi ča dalje, e... da vidimo kako je bilo. gremo u selo bože sušića. tot nisan bila nikad, ali mi se odma svidilo, lipo malo misto drniškoga kraja.
brištane, ovi bokunić seoskog putića je jedini dil izleta ča je barba božo vozija. meni je reka izađi iz tonobila i slikaj ulazak u dil koji vodi do moje kuće. tonobil je cili izlet bija u mojim rukama - eto koliko mi vridi vozačka. ponosna san! narafski, još uvik još učin. je li vas zanimaju detalji, a? e sad ćete vidit ča je to stara kuća u dalmatinskoj zagori, koje su lipote tot skrivene, ča se sve tot interesantnoga more nač, e...
pojata, stari kameni zid
detalj, stara ponistra, škure
smokva, zid... ča mislite jesmo li čokali smokve, a? narafski, drito sa stabla. evo me u takvoj akciji. ovo je isprid kuće barba bože.
a gledaj sad ovo, otključaj konobu starin ključen. stari ključ je posebna dragocjenost. sićan se da je moja pokojna baba, mater o' oca, jedan slični iz rodne kuće s otoka pomno čuvala. narafski, još uvik smo u selu barba bože... u betinu ćemo poslin. ajmo sad vidit ča sve jema u konobi barba bože.
još malo smokav, gospe moje ča je dobro doč na selo i udrit po domaćin smokvama... nima bolje...
još jedan zanimljivi detalj, dvor, stara morša
ajmo ča u još jednu zanimljivu prostoriju, ovo je prava pravcata vlaška peka. radi i dandanas, barba božo pođe u svoje selo i kako kaže utira o' ispod nje puno lipih bokuna...
e, a ovo je barba božina kuća o' starine. priča mi čovik kako kroza vrime domovinskog rata nije moga do svoje kuće, četnici su tot bili učinili okupaciju, a u barba božinu kuću učinili svoj štab. prestrašno. a jopet kad pogledaš, zafaljujući temu je nisu užgali.
e... iako san u drniškon kraju, sad ću reč: gospe sinjska, a šta je sad ovo, a? za vozit po ovako postavljenin znakovima stvarno triba jemat najlipšu vozačku na svitu, e... a to je narafski baš ova moja 
evo idemo ča, finito brištane, e... a narafski bili smo u brištane.
e a da ponovimo, a di su ono brištane, a? dalmatinska zagora, drniški kraj, tot je najbolji pršut na svitu. još ću ovod napomenit da s vlajima iz drniškog kraja, iako su tvrdoglavi ka vrag (to su geni kameni), ipak nekako uspijen izač na kraj, eto s barba božom sušićem san stekla vozačku, kod drniškoga vlaja profešura slavka vujevića san magistrirala itd. on mi je recimo reka, e , da ti nado nemaš bokun gena kamenih (a takvih najviše jeman ih po ćaći bodulu), sve bi išlo teže. geni kameni daju upornost. more bit da jema istine u ričima dotura slavka. sad vas vodin u kraj moga ćaće, otok murter, šibenski arhipelag. kako je danas na murteru tužno sićanje na poginule pompjere, ovod nima činit monade, izlet smo nastavili kranje skromno.
evo nas, murter gradina, ovod se gre za kornate, a ja san bila babi na groblje.
obidvali smo u restoran ča se zove račić, izili smo lignje, bilo je dobro, nećemo se žalit, ma ke, e...
u jučer spominjanu marinu hraminu nisan njanci stigla uč. samo san ka tica proletila kraj nje. eto ti ga na, priša i uvik priša... jedan dan ću valjda tot vezat bokun broda.
kad san tot, na murteru, među brodima, odma se rekuperan, skupin forcu za dalje i sve mi se odma pari bolje. kako godine idu i iako mi cila fameja živi u splitu i zadru, a sestra mi je u stranjskoj državi, ja sve višje ovi Otok zoven riči doma. sa skoro 37 moje doma su: split, zadar i murter. ostatak dalmacije jubin svin srcen, lipe naše isto, ali na ova tri mista se ćutin ka kraljica.
smokava jema i na mome otoku, a suše se na suncu
vala slanica, banjanje, jo, gospe moja kad san ušla u to more, more ča je tot, koji osjećaj, kako je dobro, uajmeeee... na otoku san bila u zadnje vrime, ali ovod nisan bila jušto 3 godine... a tako čeznen da dođen tot češće, a i u druge lipe vala otoka murtera.
evo još detalja iz mista murter na otoku murteru... ajmo ča , upeklo je... vodin vas u betinu, misto moga ćaće...
barba božo je i narafski i na otoku trefija masu poznatih. do splita san vozila ja, jadranskon magistralon i moran priznat da mi je bilo puno lakše vengo priko vlaške, valjda zaradi tega ča taj put ipak bolje znan. godina dana šofiranja je iza mene, nisan prešla puno km, oko 2000, ali ipak danas san vozila nekoliko uri i bila u sva ova mista. sritna san zaradi tega! svih 50 litratih morete uvećat klikon, a ja ću još reč da je ovo bija izlet za 5. gren ča, jemate pozdrav!
e...
iako je vrime jutros bilo očaj i katastrofa, vozila san twingića i narafski da san ponosna na sebe jerbo san ga danas dovezla do Makarske.
kofi je nešto najvažnije kad negdi stignen, a ova na makarskoj rivi je stvarno bila odlična. još san lipo otvorila laptop i spojila se na net, pročitala poštu, vidila ča jema novega.
ajmo ča dalje, triba učinit posal. nekog vraga smo uspili, nešto i ne, povodanj je čoviče, a za pegulu smo zaboravili lumbrelu. narafski, jedna pegula nikad ne dolazi sama, nigdi ne vidin butigu da kupin jednu. hmmm, oli nije dosta ča mi je jutros najranije krepa mobitel (dobro je i dura 2 godine, a ništa triba vazest štagod novo), sad još i ta vražja kišaaaa, grrrrr... murphyjev zakon - jedna nevolja nikad neće stič sama. kvraguuuu.
kačićev trg u makarskoj jutros by xvii
pusta makarska by xvii
riva u makarskoj i šjor galeb, kontraverzna skulptura by xvii
ajmo ča, nima se smisla višje tot močit, vratit ćemo se drugi put. xvii jopet vozi, s biokova se najedanput stvori magla. gusta, ružna, grozna magluština, to plus kiša, ne vidiš prst o' isprid nosa. gospe moja čuvaj nas. vozin i molin se bogu, jo da je izač odavde. u djeliću sekunde vidin trokut. fala bogu da san ga uspila vidit. kočin. kočin. aaaaaaaa, stali smo. "fala ti majko božja" - samo izusti ante. srića da san vidila trokut i uspila stat, neću njanci mislit šta je moglo bit. poza ovega komentiramo, koja magluština, mirakul, ajme, ma da smo znali da će bit ovako ne bi danas ni išli, šta nam je ovo tribalo. vozin dalje, začas smo u omišu, aj, još malo i eto me u splitu. skidan mokre čizme, trpan foje u njih, obid i pravac vip centar, gren vazest štagod.
jesan šta našla, a? a jesan, jednu odličnu spravicu, jopet iste marke i sad je gren ušestat, ča bi rekli personalizirat, proučit di mi svira, a di mi piva... ekola, pozdravljan lipo, stojte mi dobro.
e... krenili smo jutros u 8 uri iz splita za poslon. nije to opće triba bit izlet, vengo tek jedan radni odlazak u šibenik... ja i jedan moj kumpanjo, svak zaradi svojega posla. narafski, posal smo napravili, a dan je bija tako lip, ka za bogove... e sad, vidi lipote, vidi divote, ko je moga proč kraj tega, a ne slikat to, a? evo nikoliko litrati. guštajte!
ponosna san na sebe jerbo san vozila do šibenika, poza tega vodice, a poza tega san prošla i tri kvarta murtera, tisno, murter, betina, nisan jedino bila u jezera. ko je jutros kad san se digla iz postelje opće moga promislit da ću vižitat otok - odluka da se gre tamo je bila iznenadna, inspirirana lipin danom. narafski, skroz dobro odlučeno.
narafski da san vozila i nazad u split. iz šibenika san se javila barba boži sušiću ča mi je bija instruktor u autoškoli sušić, ono, neka vidin on di san ja došla s mojon baby vozačkom koju jeman tek 6 miseci. oko 7 navečer uri zove mene barba božo, ka da provjeri jesmo li se sritno vratili nazad, jesan li živa... pukla san o' smija. da živa, haha, a narafski da ću bit, živa i zdrava, a kako otok puni baterije, to je nešto nevjerojatno, priporučan svima da se zalete tamo ako ikako moredu.
litrati redom: šibenik (1-6), vodice (7-8), otok murter - misto betina (8-15)... ka i uvik uvećavaju se klikom...
šta ćemo još za danas napravit, a? a mojoj materi i ovim puten zaželit sritan rođendan, popit sokić i kako još uvik dura misec jubavi reč dalmacijo jesi lipa, volimo te...
e...
danas je nedilja. ajmo ča negdi popit kavicu. najprvo smo mislili poč do trogira, ali kad smo došli do tamo pala je odluka: ajmo ča do marine i produžin lipo samo (jerbo vozila san narafski ja i to pun twingić svita). ajmo ča vozit još malo, nisi reka keks i eto marina.
za sve one ča ne znaju di je i kako doč evo bokun karte:
svi su litrati by ja, osin ovega di san ja. morete ih uvećat klikom.
marina je dakleM malo smišno misto do kojega ćete doč ako od trogira grete prima šibeniku. pripoznat ćete je prima kuli koja ja najistaknutija građevina u misto. narafski, tot morete nač brode, lipe plaže, masline. kavica je bila super, a višje informacija o marini jema ovod:
http://www.trogirinfo.com/hr/marina/
ko je vozija nazad, a? eeee ja i na to san ponosna. kiša je bila poveća, ali smo se svi sigurno vratili u st. još đir po splitu i ajmo ča doma - do iduće vožnje twingić je na parkingu, a ovi mali izlet sigurno spremamo u sićanje i ovod, na internet, e... ;)
a kako je u omišu, a? evo tot su litrati, e...
http://www.flickr.com/photos/xvii_st3/sets/72157605488831185/
evo kako je jučer bilo u omišu. ovo san došla tonobilon o' autoškole, čovik šta se slika sa menon je instruktor božo sušić, iz autoškole sušić.
e... jučer san bokunić poviri do metropole i karlovca. skoro ka i uvik, u jednom danu XVII u zagreb, XVII iz zagreba. kako su mi niki purgeri rekli da su na moj blog samo slike dalmacije, aj, gren dat i bokunić kontinenta by XVII
jučer:
negdi na dalmatini by XVII
zagreb by XVII
kazalište u zagrebu by XVII
sličica s ilice by XVII
jedna od četiri (rijeke) by XVII, karlovac
jedna od četiri (rijeke) by XVII, karlovac
jedna od četiri (rijeke) by XVII, karlovac
jedna od četiri (rijeke) by XVII, karlovac
karlovac by XVII
karlovac by XVII
negdi na dalmatini by XVII
kako ovi blog brez splita ne more jema i danas:
porat u splitu by XVII
sve morete uvećat klikon.
jučer me tokalo radit cili dan, a danas san uvati bokunić vrimena...
di ćemo, a?
ajde, gren vas odvest u Solin, to je jedno 3 do 5 kilometri o' Splita. kažu: da nije jubavi, ne bi svita bilo, a ča se tiče Solina moremo reč: da nije Solina, ne bi Splita bilo.
Solin jema bogatu prošlost (za više detalja vidi: http://www.solin.hr oli http://www.solin-info.com ) a vrlo je bitan i u vjerskom smislu - siti se npr. vižite pape. narafski, danas tot jema i brdo butigi.
kako do tamo doč? tonobilon je najbolje, a ako to ne morete jema tantobus, br. 1 oli 16. ako (povratnu) kartu split-solin vazmete na biljetarnicu, ona će vas doć 18 kunića.
danas je bilo mrvu friškije, pa san uvati bokunić arije uz rijeku Jadro, učini litrate po Gospinom otoku, na kavicu i doma. drugi put ćemo još štagod slikat za potribe:
dojam: Solin je čist, uredan, prva liga. postaje misto sve ugodnijeg življenja.
a di se popila kavica, a?
e, poznavatelji solinskih kafića će odma znat di je ovo, a ja ću van reč da je iz tega kafića lip pogled na rijeku. onda koji je, a? dvije palme.
sve litrate oli slije morete nać i ovod:
http://www.flickr.com/photos/xvii_st3/sets/72157602578325871/
http://www.flickr.com/photos/xvii_st3/sets/72157602578325871/show/
posebno guštajte u rijeci, zelenilu, patkicama i pačićima... (da, da, jema i pačića - samo pažljivo gledat, e)
ekola, gren ča još malo guštat nedilju. jemate pozdrav!
e...
danas mi je bija (čak) drugi slobodan dan ovo lito. nikidan se povirilo zadar, moj rodni grad, a u planu mi je bilo na idući slobodni dan poč do otoka murtera i mista betine, mista moga ćaće. zanimljivo da se lani na 02.09. bilo tot. vidi link.
s obziron da se na kornatima dogodila nezapamćena tragedija, da je poginija mlad svit, da je kornat gorija ka da je o' karte, a ne o' sitna i da cili murter, a i dalmacija ne moredu još virovat da je ovako nešto bilo moguće, murter će me još počekat. nije red sad poč tamo guštat, a ni izisit koji lipi bokun.
narafski da u splitu ne triba stat na slobodni dan, split volin, on je moja mladost, moje sve, ali di popit kofi, a? nije loše povrj acya, ali tot moren i radnin danon. riva je sramotna, zaobilazin je šta je više moguće i gren priko prokurativa i o' lučke kapetanije pa priko pazara, duša mi pati, ne more XVII gledat oni zločin ča su ga tamo učinili zli judi.
jema jedno misto ča vam je na po ure o' splita. to je jedan puno lipi gradić. zove se trogir. cili grad štiti unesco.
tot je:
1. povijest
2. raj za činit litrate
3. raj za banjanje
4. raj za nešto lipo izist
5. raj za zajubjene
6. raj za nautičare
7. dosta svitskih bogatuna na litovanju
i još puno tega, ovisi ča tražite, e...
priporučan tamo iz splita poč tonobilon, a ako niste u mogućnosti tako, provajte buson ča naprimjer gre za šibenik, zadar oli zagreb (priko zadra). tako ćete doč najprije, a proč najjeftinije (iz splita do trogira vam je tako oko 10 kuna), a ako pođete lokalnin autobuson duže ćete se vozit, neudobnije i karta će vas doć oko 20 kuna. ove se cifre odnose na jedan smjer.
e, sad. poč u trogir i jemat novi aparat, a bit XVII, hm? morete mislit muke kad se došlo doma, pusti litrati, jedva se odlučilo koji će poč na net.
za nač osnovne informacije o trogiru (mogli bi se libri o njemu napisat, e), priporučan ove adrese:
znači, trogir danas. guštajte, ja jesan.
najprvo jedna sa šlagon :o)
onda katedrala, sv. lovre oli sv. ivana trogirskog
radovanov portal
kamerlengo, riva
iz trogirskih kala
xvii iz splita, u trogiru gušta dalmaciju
zaradi čega uvik gledat kroza ponistru, a? more se gledat i kroza vrata, e...
upeklo je, ajmo ča priko mosta
bogatuna jema, narafski
ipak, lipši mi je ovi litrat
a, evo i s banjanja litrat...
ma evo i još jedan, e...
more je ludilo, a ne fali ni meni ništa :o)
a jema li viškova? uajme, puno, bidna XVII :o))))))))
narafski, nećemo se stalno ni golacat, jopet jedan litrat u robi
ajmo ča jopet priko mosta
restoran kamerlengo, u čekanju obida
uajme, lignje na žaru, deset petica kuvaru!
još malo gušta na kamenoj rivi, riva je naime kamena kod normalnoga svita
jedan zanimljivi odraz
i jedan zanimljiv pogled...
kraj? ma ke, nije to sve, jema još litrati ovod:
http://www.flickr.com/photos/xvii_st3/sets/72157601818837600/
a morete pogledat i cili izlet ka slide show:
http://www.flickr.com/photos/xvii_st3/sets/72157601818837600/show/
aaaaaa, evo i jedan filmić:
sve morete uvećat klikon. potpisujen sve litrate osim onih na kojima san ja. potisujen i filmić. sve u svemu bija je ovo jedan lip izlet i dobar dan. a dan je narafski ulipšala i blanka vlašić. svaka joj čast!
ekola, to je to. bilo je dobro! neka gušta ko oće, a oni ča ga smeta neka pati, meni je zaradi prijatelja i kumpanji uvik drago ča im je nešto moje drago, a ča neprijatelji pate, e, to, to mi je posebno drago, e...
ovi će post poč i u: http://xviiskitnje.mojblog.hr
e...
jema jedan Grad ča ga puno volin. nismo se odavno vidili, proćakulali, rekli jedno drugome da se jubimo. počeja mi je toliko falit da mi je višje došlo ugrist koga.
zaradi tega u subotu (moj prvi slobodni dan ovo lito) u 6 uri ujutro sidnen u autobus i via Zadar , moj rodni grad. to vam je najlipši grad na svitu poza splita.
odma vam moren reč da je jednodnevni izlet iz splita u zadar dosta složen i da je bolje poč autobuson vengo tonobilon; put dura, a nije lako ni vozit simo tamo 6-6,5 oli 7, dikad i 8 uri, kako se potrefi konfužjun na cesti. jednako vrimena se potroši i autobuson, ali te drugi vozi. za poč i vratit se van triba oko 200 kunića (po skoro sto u svakon smjeru).
znači, Zadar.
grad ča je bija glavni grad dalmacije (tot se dalmacija i danas itekako ćuti, riva je kamena, nikakve čevape nisan vidi, a ni jednu cajku mi uvo nije čulo. ne kažen da nima i tamo tega, ali nije viđeno o' moje strane), grad košarke, grad bogate sveučilišne povijesti, grad povijesti općenito, grad di sunce najlipše na svitu gre leč, grad di more svira najlipšu mužiku.
domaći rad: proguglajte i nađite o starosti samoga grada i sveučilišnoj tradiciji.
odgovori: grad je star priko 3 000 godin (ričima: priko tri iljade godin), a sveučilište je prvo na tlu hrvatske, priko 600 godin.
znate ča ću vam reč svitu moj. ove monade ča se događaju splitu (riva, marmontova i sl.) bole svakoga čovika ča istinski voli split. puno je to grubo gledat. u zadru nije tako. taj grad je svaki put kad ga vidin sve lipši i lipši.
evo kako je bilo jučer, uvećava se klikon:
pjaca
kalelarga
XVII i sv. donat
XVII i (kamena) riva
kopnena vrata
sv. stošija
trg 5 bunara
foša, heh, odakle je ovo slikano, a?
obid, restoran noštromo, blizu vruljice, za +5
sv. marija
XVII i morske orgulje
e, ovod more čini najlipšu mužiku na svitu
jučer su mi zadrani rekli:
"a ča je splićanko,
ostavija te split brez
rive pa si došla guštat u zadar, a?"
dakleM, za sve one ča ne znaju: riva je kamena. oduvik. to u dalmaciji triba bit tako. prije vengo učinite još pi*darija po splitu pođite u zadar vidit ča je to riva i kako to izgleda kod normalnoga svita.
narafski da se i banjalo. tri puta u more. a neću valjda bit na moru, a ne obanjat se, e... a di je ovo, a? e, pa nije borik, to zadarski znalci odma vide, vrimena za poč u petrčane oli u nin, nažalost, nije bilo, a za preko pogotovo. u subotu je narafski na kolovare konfužjun. na rivi se svit banja u svih 16, ali nisan ni tot. e pa di san, a? zadrani su su skontali, za ostale sumnjan. za ovo nač triba zadar znat ka svoj žep, e... evo ću van ipak špijat: o' ispod elektre, e. e tot je, e... nije bilo loše s obziron da mi je dan bija o' puta cili dan i da je tribalo učinit masu litrati, a guštat i zadar cili, a ne samo more, e...
kamen, ah kamen, za kamenom mi duša čezne
ovo se već pripreman za nirvanu, zalazak i orgulje, nešto ča je nevjerojatno. kažu da je zadarski zalazak najlipši na svitu. jučer ga je stotine furešti slikavalo kraj mene. svit je ushićen, kako zalazi samo viču: uajme, uajmeee lipote. na svin jezicima svita. crni, bili, žuti. došli su iz svih krajeva svita da to vide. a tot su odma i morske orgulje. dakleM, ovo je nešto šta morate doživit. zaradi tega, pravac zadar.
zaradi ovega litrata me tokalo trkat
na bus za split, ali vridilo je. jerbo, mirita, a?
znači oboreni su svi rekordi, o' rive do bulevara za manje o' dvadeset minuti. na noge, narafski. jo, ča su mi zadrani vikali puten: a ča je splićanko, trčeš doma, a di ti je priša, a? a meni stvarno nije bila psihička priša, zadar toliko volin da bi zaradi njega split moga bit i ostavljen na nikoliko dan. vengo, tribalo je uvatit taj vražji riječki, e... a riječkome opće nije bila priša. najprvo je bokunić okasnija, a onda je umisto u 9 manje kvarat krenija poza devet. u split me je doveja u ponoć manje kvarat. zaradi njega se nije uvatija aparaton osvitljen most, ali pomalo, jema dana, narafski da ću u ZADAR poč i jopet.
lipi moj grade, uvik te se sitin.
ovako svitu moj, ovo je tek kraći izvještaj. više litrati jema ovod:
http://www.flickr.com/photos/xvii_st3/sets/72157601665666918/
svaki morete uvećat klikon. potpisujen sve osin ovih na kojima san ja. ispod svakoga piše ča je to. na stranicma www.zadar.hr jema i bokunić povijesti. narafski i drugih korisnih informacija.
sve morete vidit i ka slideshow ovod:
http://www.flickr.com/photos/xvii_st3/sets/72157601665666918/show/
žalosno je odit po svitu, proučavat indiju i kinu, a ne upoznat najprvo ono ča ti je na tri ure o' doma, e...
meni je jučer bija jedan o' lipših dana u životu. nadan se da ste i vi guštali.
ekola, gren ča, jemate pozdrav!
ovo će poč i u :
šibenska katedrala by XVII
betina, murter by XVII
cili izlet: http://www.flickr.com/photos/xvii_st3/sets/72157594391051692/
ili ka slide show: http://www.flickr.com/photos/xvii_st3/sets/72157594391051692/show/
e... klik na litrat da bude veći. ovo smo mrvu otišli put šibenika, pa još na moju didovinu po ćaći, otok murter. ča sve jema ovod, a? a šibenik, šibenska katedrala, zatin murter, misto betina (tot se čine drveni brodi, tot je drvo svetinja). ka ča vidite, u betinu smo trefili falkušu, povirilo se do marine i škvera, a banjat smo se bili u uvalu slanica (mmm tot je raj na zemlji), uvatili smo i vrime o' dizanja mosta u misto tisno, bili i na dil didovine ča je drugu bandu mosta, odatle gledali pirovac i poza svega tega via split. izlet je dura cili dan. more je ludilo, o' furešti i konfužjuna na murteru se jedva diše. ništa čudno. tek je deveti misec, e... ekola, gren leć. kasna je ura. jemate pozdrav!
notano o' xvii: 03.09.2006. 01:16jutro: kartušina, brdo posla, srića ča je G. ugodno društvo u ton poslu pa je mrvu lakšje. litrati o' tega dila dana niman.
pozapodne: more je najlipše poslin kiše. kraljica spliskih plaža, kašjuni (kašuni). neka litrati govore. guštajte!
večer: Omiš, mrvu je friško, ali lipo je... evo par litrati.
potpisujen sve osin zadnjega, e... kako znan da će N. povirit ovod, moran reć, fala N.... litrati se, ka i uvik, uvećaju ako se klikne na njih.
e, ši, zaradi kategorizacije ćemo ovod stivat i linkove na stare tekstove o Omišu. ko nije čita more povirit, a ko je čita more se sitit.
2. omiš, mora se vidit, nikako priskočit, e...
notano o' xvii: 31.08.2006. 14:18
e, malo nevere , e... pa šta onda, a? ako je nevera, nije lav, e... petak je, večer, lito, ajmo ča u trogir , puno lipi gradić blizu splita ča je pod zaštiton organizacije unesco. sve je puno furešti, konfužjun sa jedne i druge bande o' mosta, svita na rivi koliko oćeš, gradić svitli jednon pitomon žuton koluron. ja van ovod dajen svega nikoliko litrati za gušt. ako ste u split, nije se problem do tamo zaletit. a ako dođete u split bilo poslovno bilo ka furešt, e onda je žali bože bit ovod, a ne poć do tega lipoga gradića i ne vižitat sve ča tot jema za vidit, e... dakle(m), priporučan teplo, e... ekola, gren ča, jemate pozdrav!
notano o' xvii: 26.08.2006. 14:33
zaradi čega o Omišu jema, a o drugin mistima nima, a? - pitali ste me u jednon od mailova. a evo, počelo se to o našin malin mistima malo notavat pa ćemo danas nastavit s tin... palo mi je jutros na pamet kako su me mater i jedna njena prijateljica, ča je baš iz omiša, još u ranon ditinjstvu odvele malo u vlašku da ka gradsko dite oćutin mrvu kakve su tamo stine i povonjen kakva je tamo arija. danas se mislin kako mi se to misto trajno usiklo u sićanje.
di smo, a?
Imotski, e...
ne znan zaradi čega, ali uvik kad neko spomene Imotski prvo ča mi padne na pamet je ova pisma velikoga Tina Ujevića.
ODLAZAK
U slutnji, u čežnji daljine, daljine;
u srcu, u dahu planine, planine.
Malena mjesta srca moga,
spomenak Brača, Imotskoga.
I bljesak slavna šestopera,
i miris (miris) kalopera
Tamo, tamo da putujem,
tamo, tamo da tugujem;
da čujem one stare basne,
da mlijeko plave bajke sasnem;
da više ne znam sebe sama,
ni dima bola u maglama.
drugo ča mi padne na pamet su jezera, modro i crveno, e... modro se modri uza imotski, pitomo je, do njega moš komodno i brez peripetije doć, svit se tot banja, a dikad kad prisuši znaju na njegovon dnu bacit i na balun. priroda je tot mater, ne ćuti se straj, povjerenje zrači.
Modro jezero
narafski, crveno nikad nije prisušilo. a i dandanas čovik misli jema li mu opće kraja. ka stvoreno je za kurjože peršone, budi maštu, o njemu su ispričane razne legende. opasno i strmo za približit se, crvene stine oko njega i šta se tot more reć vengo gledaj samo iz daleka i pazi ga se. moš probat i itnit koju stinu u njega, nakon nekog vrimena čut ćeš zastrašujući zvuk. i danas pantin kako su me ka dite čvrsto držali da se slučajno ne zaletin njanci blizu, e... mora bit da priroda mora i kontre činit, bit će je to zaradi ravnoteže, e...
Crveno jezero
siti me rič Imotski na još puno tega, ali jema dana, notat će se, ne more sve odma, e... u svakon slučaju dobro je vidit ti lipi gradić i jezera, a dok ne sidnete u tonobil oli tantobus do tamo, guštajte malo ovako priko neta. višje podataka i puno lipih slika morete nać na:
www.modrojezero.org (od ovod je ovih par sličic ča je u ovi post)
www.imotski.hr/jezerske-tice.htm
www.imotski.hr
gren ča. jemate pozdrav!
notano o' xvii: 20.01.2006., 10:51
kliknite za veću sliku.
e...
kako doć?
o' splita pa jedno 25 oli 30 kilometri. morete poć gradskin tantobuson ča više, narafski, ne staje na rivi, vengo na solinsku tamo di se čeka tantobus i za trogir, e... kako znan ča ti tantobus znači kad se u njega nakrca svita i kad staje na svaku stanicu, ja ću van radije priporučit da se na glavni kolodvor ukrcate na koji bus. jemate imoćane, pa makarski i tako. sidnete ka čovik, klima vas ladi/grije, pročitate foje dok vožnja dura, a morete gledat i kroza ponistru, e... ovako stignete puno prije i komdonije, e... a morete i svojin tonobilon oli sa kojin kumpanjon, kako van drago, e... mislin da jema i oni mali kombi taksi, e... malo gledat, pari mi se da je i to viđeno, e...
sam omiš se ričima ne da opisat. to se triba doživit. ja ću ovod probat tek dat koju sliku, link oli natuknicu da ovi ča nikad nisu bili tot bar malo oćute kako je di se cetina uliva u more. zaradi tega ulivanja u omišu i oko njega jemate krasne plaže, velike o' salbuna (morski pijesak) i male, skoro pa za dvi peršone, sa sitnin šljunkon. jemate tot šta istraživat, e... recimo, duće mrvu prije omiša i pisak mrvu poslin omiša bi tribali bit i šeiku dobri pa će onda bit i vama, e... narafski, postoji cila omiška rivijera, ni jedno misto ne želin priskočit, a vi mrvu povirite na ove linkove:
www.tz-omis.hr
www.sundance-omis.com
morete nać puno lipih slika i dosta korisnih informacija ako vas to misto zanima općenito oli naprimjer za poć na litovanje, e...
omiš je grad kala (tisne kamene uličice) i izvrsne dalmatinske spize koju puno volin guštat baš po tin kalama i to dok svit prolazi, e... ako vas put nanese u split, produžite mrvu i do omiša, jema se tot šta vidit, e... narafski, popis znamenitosti, crikvi i spomenika ča ih ne smite priskočit morete nać na priporučenin linkovima, e...
a šta još ne smite priskočit, a? ma dalmatinsku pismu za gospu blaženu, e... festival klapa u omišu je nešto ča je stvarno jako, jako dobro i to obavezno vižitat ako se na lito nađete u split, e...
omiš je i grad pjesnika. koliko ih je samo od tuda, kaštelan, pupačić... finit ću ovi post sa jednon o' pupačića, a vi lipo dođite oćutit omiš, nećete falit, e...
More
I gledam more gdje se k meni penje
i slušam more dobro jutro veli
i ono sluša mene i ja mu šapćem
o dobro jutro more kažem tiho
pa opet tiše ponovim mu pozdrav
a more sluša pa se smije
pa šuti pa se smije pa se penje
i gledam more i gledam more zlato
i gledam more gdje se k meni penje
i dobro jutro kažem more zlato
i dobro jutro more more kaže
i zagrli me more oko vrata
i more i ja i ja s morem zlatom
sjedimo skupa na žalu vrh brijega
i smijemo se i smijemo se moru
Josip Pupačić
notano o' xvii: 27.11.2005., 13:04
e...
sad mi je palo na pamet nešto iz pučke skule. bila je ura zemljopisa. ispitivanje. triba se vidit šta ko zna i šta ko ne zna, e... prozove jednu malu.
nastavnica: ajmo, rijeke slovenije, da čujemo...
prva baraba iz razreda (šapje tiho, ali dovoljno glasno da prozvana mala čuje): cetinaaaa, psssttt, ksss, cetina...
druga baraba iz razreda (šapje tiho, ali dovoljno glasno da prozvana mala čuje): cetinaaaa, psssttt, ksss, cetina...
treća baraba iz razreda (šapje tiho, ali dovoljno glasno da prozvana mala čuje): cetinaaaa, psssttt, ksss, cetina... je, cetina, reciiiiiiii...
prozvana mala (pobjedonosno): cetina!
nastavnica: ma evo tebi o' petice petina!
pouka: niko ne zna sve, ali nije ni da niko ništa ne zna. dikad triba samo malo promućkat mozak prije upotrebe, e... jerbo, bar splitska dica znaju da je cetina tot, kraj splita, u omišu, e... narafski, tot se uliva u more, teče dalmatinskon zagoron i ako vas put nanese u ovu našu dalmaciju, cetina je nešto ča obavezno morate vidit i doživit, e...
a vi dalmatinci moji, jeste li kad probali ujutro rano dok još sviće (računa se do 7 uri ujutro) uz cetinu pa prima zakučcu ili na drugu bandu prima radmanovin mlinicama, a? ne auton vengo na noge, e... jeste li oćutili kako diše rijeka u zoru, a? a u sumrak, a? ako niste, ne znate ča ste u životu propustili, e... zato kad ne budete znali di poć na izlet, a lipo na cetinu, e...
to je jedno o' mista koje puno volin u ovu našu županiju; a evo, svečano obećajen da će na ovi blog ubuduće bit još slika i spominjanja i malih mista i otoka i svega ča nije baš u sami split, ali je tot blizu i tot se more puno lipo guštat, e... ka nika priporuka, e... a sad gren ča, jemate pozdrav!
notano o' xvii: 25.11.2005., 13:56
